من بعد ما جيت اجازة الجيش دي و انا كل يوم افتح المدونه اكتر من 5 مرات ف اليوم
عاوز اكتب بس مش عارف اكتب ايه بالظبط
او الكلام بيروح مني
خايف احيانا اكتب احس ان ده ضعف مع ان مش عارف ايه المشكله ان احس اني ضعيف بس الصراحه احيانا بكره ان الي قدامي يستضعفني
احيانا بخاف افلت بكلمه ظلم لحد مع ان من لحظة ما دخلت الجيش و انا بتظلم عادي جداا حتي اول خبر عرفته لما جيت كان قهر و ظلم ليا
بس اكتر فكره بتدور ف بالي ف كل مره فتحت المدونه اكتب
هو انا لما بزعل بزعل بسبب ايه
الشخص او الحاجه الي زعلني و لا حاجه تانيه
دايما الصدمه ف الفكره او الاحساس هو الي بيزعلني و بيصدمني
بيهزني جوه اوي ان احلم و ف الآخر و كاني انسان معتوه مش فاهم الحياة و اتصدم ف حلمي
الصدمه ف الاشياء اعنف من الصدمه ف الاشخاص
لأن الشخص لو مش بسهوله بس باي حال ف احتمال يتبدل او يبرر سبب غلطته
اما الاشياء ف استحاله استحاله تتكلم و تبرر عن غلطتها
و طبيعتي الغبيه ان ببص للاشياء مش الاشخاص
ببني احلامي علي اساس الحلم نفسه و مباخدش بالي كتير من الاشخاص الي هتشاركني .. بيهتمو قد ايه بالحلم هما قده او لأ .. هما المناسبين عشان يشاركوني حلمي
مبزعلش كتير علي الاشخاص قد الاحلام نفسها ..
الحلم بيجيب صدمه اعنف من الشخص لأنه ف الغالب الصدمه ف الحلم بتجيب كمان صدمه ف الشخص
بس المشكله الي بتخليك تنهار ان اكتر من حلم ف وشك بينهار و ان كرامتك بتتسلب منك و بتتهان و انت مينفعش ترد
و تقعد علي امل 30 يوم بتستنى اللحظه الي هترجع تترمي بين ادين اكتر حد حسيت انه هيخفف عنك
ترجع تلاقيه بيقولك آسفين لقد نفذ رصيدكم
و انت مش فاهم حاجه
قمة الصدمه في طوق النجاه لغريق
الصدمه ف الحلم الي بنيته .. كانك مجنون عارف انه صعب بس قررت تخوض التجربه بعقلك و قلبك
و ترجع علشان تحس جمال الحلم .. تلاقي شريكك فيه بيعتذر بكل سهوله و كان مفيش حاجه حصلت و لا كانك كنت عايش زي الاهبل فتره من حياتك
و مطلوب منك تتعامل بكل برود كانك اخدت حقنة ضد حساسية الحلم ده تهديك من العنف الي في عقلك من كتر ايمانك بيه
متعرفش ازاي مطلوب منك تكون سخن و بعد لحظه بارد تلاجه
مطلوب منك بكل سهوله تتنازل عن حلم .. مع انه عارف ان مش بسهوله بستسلم
بس انا فعلا مستسلم .. الحلم ده مش بتاعي الفكره دي مش ملكي مش علي مقاسي اساسا
غلطتي الدائمه ان بصدق الحلم انه ممكن يبقي حقيقه بسهوله
غلطة الانجراف وراء الحروف
انا حاسس عرفت ليه اتكسر الحلم جوايا
يمكن انا غلط و اتمنى
بس الاكيد ان الحلم اتكسر علشان الشريك فيه حس انه عليه ضغوط و مش قادر يتحمل الوضع الي احنا فيه و بعدي الطويل
مجرد البحث عن الاسباب البسيطه للتخلص من الحدود المفروض و تقييد الحريه المقنع
شعورك بانك شئ يتم تحريكه كما الدمى يجعلك تكره الفكره اساسا و تتمني لو تنعزل عن سبب الشعور هذا
يجعلك تمزق الاوراق و الرسائل و الهدايا و كانك تشفي غليلك من شخص ذبحك
يجعلك لا تقدر علي التحمل كثيرا حتى لو كان في الطبيعي من السهل التخلص من الفكره و الشخص
يجعلني اندم و انا اكره ان اندم
ثم يجعلني افكر كيف اكون باحسن حال بدون الاهتمام بالآخرين كما لم يهتمو لأمرك .
ثم اتمني لو استطيع ان اعزل نفسي اكثر و اكثر ليومين فقط لأنه افضل حل املكه دائما
تحديث : في النهايه حتي لو ماتت احلام !! فمن المؤكد ان بداخلي اكسير الحياة لايقاظ تلك الاحلام و تعظيمها .
فانا اعشق الاحلام و لن اتركها تموت و لن اترك مجالا لاحد يقتلها حتي لو انعزلت عن جميع الناس و نفسي اولا
عزمي …
( رساله خاصه : كم اعشقكم يا صحبجيه فانت اعز ما امتلك)
